Kampi veror është konceptuar për fëmijët e moshës 11–14 vjeç, një grupmoshë që ka nevojë për përvoja dinamike, të sigurta dhe të strukturuara gjatë verës. Audienca kryesore janë familjet e Tiranës dhe zonave përreth, të cilat kërkojnë një alternativë të besueshme ku fëmijët të angazhohen në mënyrë të shëndetshme, të mbikëqyrur dhe edukative. Segmenti i prindërve që interesohet për këtë kamp është ai që vlerëson fort sigurinë, profesionalizmin e stafit, transparencën e programeve dhe komunikimin e rregullt.
Kampi është një program veror ditor 5-ditor që zhvillohet çdo javë të pushimeve verore dhe ofron një eksperiencë të balancuar mes argëtimit, zhvillimit personal, ndërtimit të karakterit dhe aftësive sociale. Programi përfshin aktivitete fizike, kreative, bashkëpunuese, edukative dhe outdoor, të menduara për ditë intensive kampi. Ai mbështetet nga staf profesionist dhe protokolle të qarta sigurie fizike e emocionale.
Kampi zhvillohet çdo javë gjatë pushimeve verore të shkollës, me cikle 5-ditore që rihapen vazhdimisht çdo javë. Secila javë pret deri në 100 fëmijë, duke mundësuar kapacitete të plota për sezonin
Kampi zhvillohet në një lokacion të sigurt pranë Tiranës, i zgjedhur për t’i mundësuar fëmijëve liri lëvizjeje, akses në natyrë dhe hapësira të përshtatshme për aktivitete të ndryshme fizike dhe kreative. Infrastruktura ofron zona të dedikuara për lojëra, punë në grup, aktivitete edukative dhe pushime të sigurta.
Kampi krijohet si përgjigje direkte ndaj boshllëqeve të identifikuara në treg. Studimet tregojnë se prindërit kërkojnë transparencë, aktivitete të strukturuara dhe komunikim efektiv. Fëmijët, ndërkohë, kërkojnë më shumë energji, aktivitet fizik, natyrë, aventura dhe përvoja të reja.
Kampi synon të adresojë njëkohësisht nevojën e prindërve për siguri, qartësi dhe vlerë, si dhe nevojën e fëmijëve për argëtim me kuptim, përvoja dinamike dhe mësim praktik. Përtej përvojës individuale, kampi mban edhe një dimension social: një pjesë e të ardhurave shkon për t’u ofruar fëmijëve vulnerabël të njëjtën eksperiencë, duke e kthyer pjesëmarrjen e çdo familjeje në një akt solidariteti të prekshëm dhe me ndikim real.
Kampi funksionon përmes një modeli operativ të qartë dhe profesional. Programi ditor është i strukturuar nga mëngjesi deri pasdite, me aktivitete të planifikuara që sigurojnë ritëm, angazhim dhe rezultate të dukshme. Stafi përbëhet nga profesionistë, punonjës rinorë, facilitatorë të trajnuar, me role të përcaktuara mirë dhe me protokolle të qarta të sigurisë. Prania e infermierit, masat anti-bullizëm dhe mbikëqyrja e vazhdueshme garantojnë mbrojtjen fizike dhe emocionale të fëmijëve.
Regjistrimet kryhen online përmes një landing page të dedikuar, me informacion të qartë mbi oraret, çmimet, përfshirjet dhe rregullat. Prindërit marrin komunikim ditor me foto dhe përmbledhje të aktiviteteve, duke i mbajtur të informuar dhe të qetë gjatë gjithë javës. Në fund të kampit, fëmijët marrin projekte, krijime ose demonstrime si rezultat i punës së tyre, duke materializuar përvojën e tyre dhe duke rritur perceptimin e vlerës në sy të familjeve.
Dëshmitë e të rinjve që kanë qenë pjesë e kampeve verore, gjatë kohës që ishin fëmijë, i cilësojnë si një “eksperiencë jetëndryshuese”. Kjo vërtetohet edhe nga profesionistët e World Vision, të cilët kanë vërejtur transformim tek fëmijët që kanë ndjekur aktivitetet tona.
